İlk növbədə müştəri narazılığını bildirirsə, səhvinizi inkar etməyin. Yaranan problemin həmkarınızın/müdirinizin/pis havanın/hər hansı xüsusi vəziyyətin ucbatından olması da müştəriyə maraqlı deyil. Problemin səbəbini izah etməkdənsə, onun çözülməsini təmin edin.⠀

Müştərinin sualına "Bilmirəm", "mənim işim deyil", "heç nə etmək mümkün deyil" kimi cavablar verməyin. Əmin olmalısınız ki, sonda müştəri sizdən razı getdi.

Müştəriyə heç vaxt hörmətsiz yanaşmayın. Məsələn, bəzi özünü "cool" sayan insanlar ekspert təəssüratı yaratmaq üçün müştəriyə "bacarıqsız", "məsuliyyətsiz" deməyi borc bilirlər. Siz müştərini tənqid etməli deyil, ona həll yollarını təklif etməlisiniz.

Müştəri ilə ünsiyyət qurarkən bunları etmək olmaz:

• "Biz 4 dəqiqədən sonra açılırıq" deyə qapını müştərinin üzünə bağlamaq
• Müştəriyə qüsurlu məhsul/ xidmət satdığınız halda günahı qəbul etməyib müştəri ilə mübahisə aparmaq
• Qüsurlu məhsul/ xidmətin pulunu müştəridən almaq

• Müştərilərə əzab verən daxili qaydalar tərtib edərək müştəriləri bu qaydalara riayət etməyə məcbur etmək

• Müştəri ilə təkəbbürlü danışmaq

• Yeni məhsulun/ xidmətin gəldiyini xəbər vermək üçün müştəriyə narahatedici zənglər etmək

Müştəri ilə əlaqədə təcrübəli, nəzakətli insan olmalıdır, əks halda biznesə qoyulan minlərlə, milyonlarla sərmayə göz qırpımında məhv ola bilər.⠀Odur ki, müştərilərinizi bərk-bərk qoruyun, müştəriyönümlü biznes olmaq üçün böyük addımlar atın!